پکتيا کې ګلبڼ میاشتنۍ مشاعره جوړه شوه

د پکتيا ولایت د اطلاعاتو او کلتور رياست اړوند د هنر او کلتور آمریت له لورې د ګلبڼ مياشتنۍ مشاعره د ګڼ شمېر شاعرانو په شتون کې جوړه شوه.
د اطلاعاتو او کلتور رئیس مولوي ثواب جان اسلام یار د مشاعرې په پیل کې وویل: دا ډول ادبي ناستې او مشاعرې د شعر او ادب د پیاوړتیا لپاره ډېرې ګټورې دي، که د شعر او ادب تاریخ ته ځیر شو، دا به راته په ډاګه شي، چې سترو شاعرانو او لیکوالانو دا ډول ناستې کولې، نوموړي زیاته کړه؛ ادبي ناستې ورځ تر بلې زیاتېږي، چې فرهنګي ډګر ورسره غښتلې کېږي او د شاعرانو ترمنځ یووالی پیاوړی کېږي.
د مشاعرې په ترڅ کې شاعرانو په خپل نوبت ترتیب کړل شوي اشعار د مشاعرې ګډونوالو ته واورول، او د شعر په ژبه يې د هېواد جوړونې ذهنیت او پیغامونه وړاندې کړل.
شاعران او د شعر مينوال وايي: دا ډول مشاعرې او ادبي ناستې د فرهنګي ډګر پیاوړتیا او ادبي فعالیتونو لا غوړېدا لپاره خورا اړینې دي.
د یادونې وړ ده، چې ګلبڼ مشاعره هره مياشت د دې ولايت د اطلاعاتو او کلتور رياست له لورې ترسره کېږي، چې ګڼ شمېر شاعران، ځوانان او د شعر مينوال پکښې ګډون کوي.

۱۴۴۶/۶/۵ هـ ق
۱۴۰۳/۹/۱۷ هـ ل