په پروان کې د حکومت او رسنيو د ګډې کميټې غونډه ترسره شوه

د حکومت او رسنيو د ګډې کميټې غونډه نن له غرمې مخکې د پروان ولايت مقام کې، د مرستيال والي مفتي محمد ادريس انوري په مشرۍ، د کميټې د غړو په موجوديت کې ترسره شوه.
مرستيال والي مفتي محمد ادريس انوري وويل، هر شخص د خپل توانايۍ په اندازه د الهي احکامو په تطبيقولو، دين ته په خدمت کولو او د امر باالمعروف او نهی عن المنکر چارو په ترسره کولو مکلف او مسئول دي.
نوموړي همدا راز وويل، اوس وخت کې رسنۍ د امربالمعروف او نهی عن المنکر د ترسره کولو لپآره بهترينه وسيله ده،چې له همدې لارې ځوانان د کاميابۍ لور ته دعوت کولای شو.
د اطلاعاتو او کلتور رئيس مولوي شمس الرحمن صديقي وويل، رسنۍ د اسلامي امارت د لاسته راوړنو د نشر او د اسلامي امارت د پاليسۍ د تطبيق په برخه کې مسئولې دي.
ښاغلي صديقي زياته کړه، د حکومت او رسنيو ګډه کميټه ډيرې لاسته راوړنې لري، چې يوه يې هم د حکومت او رسنيو تر منځ د همغږۍ رامنځته کيدل او همکاري ده.
نوموړي له خبريالانو څخه غوښتنه وکړه تر څو د خپرونو پر مهال بې طرفي مراعت کړي او د ملي ګټې په پام کې ونيسي.
د غونډې په جريان کې نورو ګډونوالو هم خپل نظريات شريک کړل، او د يادې کميټې په لاسته راوړنو يې رڼا واچوله.
د غونډې په پای کې مرستيال والي رسنيو ته په خطاب کې وويل، د ټولو رسنيو فعاليتونه بايد د اسلامي شريعت مطابق اوسي،  په ټولنيزو شبکو کې د اسلامي نظام څخه د بغاوت کوونکو مربوط خپرونو څخه بايد مخنيوی وشي، اسلامي امارت د رسنيو فعاليت ته د اسلامي شريعت په رڼا کې ژمن دی، او راتلونکي غونډه کې بايد د کميټې غړي او خبريالان ګډون وکړي.
‍۱۴۴۴/۱۰/۱۲ ه ق 
۱۴۰۲/۲/۱۲/ ه ش