په هرات ولایت کې درې راډیوګانو په رسمي ډول فعالیت پیل کړ
دوشنبه(۲۲د رمضان المبارک ۱۴۴۵) په هرات ولایت کې د حریت، امید او شریعت په نومونو درې راډیوګانې پرانیستل شوې او په رسمي ډول یې خپرونې پیل کړې.
داطلاعاتو اوفرهنګ وزارت د نشراتو معين مولوي حيات الله مهاجر د رسنيو مثبت رول ته د اشارې په ترڅ کې وايي: اسلامي امارت د ښې حکومتولۍ په ښه والي کې د رسنيو رول مهم بولي او اسلامي امارت د هغو رسنیو ملاتړ کوي،چې خپرونې یې د اسلامي امارت له قوانینو او ملي ګټو سره سمې وي.
د هرات ولايت د اطلاعاتو او فرهنګ رئيس مولوي احمدالله متقي د حقايقو په بيانولو کې رسنۍ مهمې وبللې او زياته يې کړه: رسنۍ د لويديځې نړۍ د فرهنګي يرغل په وړاندې د پام وړ رول لوبولى شي.
د شريعت راډيو استازى انجنير محمد نبي قاضي زاده وايي: د بېلابېلو خپرونو په پيلولو سره غواړي خپل اورېدونکي له بېلابېلو برخو خبر کړي. هغه زیاته کړه: حریت، امید او شریعت راډیوګانې ۲۴ ساعته فعالیت کوي او د دغو راډیوګانو اصلي خپرونې د هېواد له مرکز څخه دي.
د يادونې وړ ده،چې اوس مهال په هرات ولايت کې ٢٨ نورې رسنۍ فعاليت کوي.
