په نیمروز کې د اطلاعاتو او کلتور ریاست د ښوونیزو کورسونو څخه  ۱۵۳ تنه زده کوونکي فارغ شول

تېره ورځ په نیمروز ولایت کې د اطلاعاتو او کلتور ریاست د ښوونیزو کورسونو څخه ۱۵۳ تنه زده کوونکي د خطاطۍ، کمپيوټر، انګليسي او عربي ژبې، د درېو مياشتنيو کورسونو د پنځمې دورې څخه فارغ شول.
 د فراغت په غونډه کې یې د نيمروز ولایت د اطلاعاتو او کلتور رئیس مفتي حبيب‌ الله الهام، د ارشاد، حج اوقافو رئيس، مولوي فضل الرحمن مستغفر، د نیمروز د لوړو زده کړو مؤسيسې رئیس، مولوي محمدصدیق بني‌کمال او یو شمېر ځوانانو ګډون در لود.
یاده فراغت غونډه د قرآن عظیم الشان د مبارکو آیاتونو په تلاوت سره پیل شوه، ورپسې د نیمروز د اطلاعاتو او کلتور رئیس مفتي حبیب‌الله الهام مېلمنو ته د ښه راغلاست او فارغینو ته یې د مبارکۍ ویلو سربیره، د مهارتونو د ترلاسه کولو او د هغې پر اهمیت خبرې وکړې او د نوې ژبې او مهارتونو زده کول یې د هیواد په پرمختګ کې اړین وبلل.
ښاغلي الهام زیاته کړه، د ا.ا.ا نظام او مسؤلین د ځوانانو د پرمختګ او ترقی لپاره ډیر پلانونه لري.
ورپسې د نیمروز د لوړو زده کړو مؤسیسې رئیس، مولوي محمدصدیق بني‌کمال، د ځوانانو د ظرفیت لوړونې په موخه د اطلاعاتو او کلتور ریاست هڅې وستایلې او همدارنګه یې د الله (ج) د پېژندنې په باره کې خبر وکړې او ویې ويل، الله تعالی انسان د خپل ځان د پېژندلو لپاره پیدا کړی او موږ د علم له لارې الله (ج) پېژنو.
ښاغلي بني‌کمال، ځوانان وهڅول چې د الله (ج) د پېژندنې لپاره لا ډېر علم زده کړي.
غونډه فارغانو ته د تصدیق پاڼو په ورکړي او د ارشاد، حج او اوقافو رئیس، مولوي فضل‌الرحمن "مستغفر" په دعا سره پای ته ورسیده.

۱۴۴۴/۱۰/۱۱ هـ ق
۱۴۰۲/۲/۱۱ هـ ش