په نورستان کې د عامه کتابتون اړوند يو ورځنی سمينار ترسره شو

په نورستان ولايت کې د اطلاعاتو او کلتور رياست په همږغۍ د شانتي رضاکاره ټولنې لخوا په مرکز پارون کې يو ورځنی سمينار د کتابتونونو د غنامندۍ  په موخه جوړ شوی وو، چې د مرکز پارون په ګډون د واما او کانتیوا ولسواليو د کتاب لوستنې مينوالو او قومي مشرانو هم پکښې ګډون کړی وو.
د سمینار په پيل کې د نورستان د اطلاعاتو او کلتور رئیس مولوي سميع الحق حق بيان د شانتي رضاکاره مؤسسې له مسؤلينو څخه مننه وکړه، چې د نورستان ولسونو لپاره نه ستړې کيدونکې هلې ځلې کوي.
نوموړي وويل: تر دې مهاله شانتي مؤسسې په نورستان ولايت کې درې کتابخانې او د خياطۍ کورسونه په مرکز پارون، واما او کانتیوا ولسواليو کې جوړې کړي دي، چې دغه ټول کارونه د نورستان د ولسونو په خير دي.
د شانتي مؤسسې مسؤل محمد طايب ملکزي د دغې مؤسسې په ارزښت او اهميت خبرې وکړې او زياته يې کړه؛ په مرکز او ولسواليو کې مو تر دې مهاله درې کتابتونونه جوړ او ګټي اخستنې ته سپارلي دي او په راتلونکې کې پلان لري چې د نورستان په نورو ولسواليو کې هم ورته نور کتابتونونه پرانيزو ترڅو ولسونه يې له ګټو برخمن شي.
ورپسې د يو شمېر نورو ادارو مسؤلينو او مخورو مشرانو پخپل وار سره د شانتي مؤسسې له مسؤلينو څخه مننه وکړه او داسې کارونه يې د ټولنې په ګټه وښوده او ډاډ يې ورکړ، چې د نورستان ولسونه او مسؤلين په هر وخت او هر ځای کې د شانتي رضاکاره ټولنې سره همکار دي او په راتلونکي کې يې د لا نورو پروګرامونو غوښتنه وکړه.

۱۴۴۶/۹/۶ ق
۱۴۰۳/۱۲/۱۶ ل