په فراه ولايت کې د مطبوعاتو د ازادۍ نړيواله ورځ ولمانځل شوه

نن چهارشنبه (۱۳ د شعبان) د افغانستان د ژورنالیستانو د ملي ټولنې له لوري د اطلاعاتو او کلتور رياست د غونډو په تالار کې د مطبوعاتو دازادۍ ورځ ولمانځل شوه، چې د اطلاعاتو او کلتور  رئيس مولوي عبدالحی سباوون په ګډون د اطلاعاتو آمر فاضل فياض، د ګڼو رسنيو مسئولينو، د افغانستان د ژورنالستانو ملي ټولنې غړو او د ملي او نړيوالو رسنيو خبريالانو پکې برخه اخستې وه.
پيل کې د افغانستان د ژورنالستانو د ملي ټولنې ولايتي مشر ابراهيم محمدي د یادې ټولنې د موخو په اړه معلومات ورکړل، نوموړي همدا راز وويل، په فراه ولايت کې د خبریالانو کړنې د پخوا په پرتله ښې شوي او مسؤلینو تل له خبریالانو سره د جزئیاتو په ورکړې کې همکارې کړې ده، د ټولو خبريالانو موخه ولس او نظام ته چوپړ کول دي او تل هڅه کوي، چې د ولسونو ننګونې او ستونزې هوارې کړي.
د فراه ولایت د اطلاعاتو او کلتور رئیس مولوي عبدالحی "سباوون" د رسنیو د ازادۍ د ورځې د مبارکۍ ترڅنګ زیاته کړه، رسنۍ د نظام څلورمه قوه ده او د کړنو موخه یې د ولس او دولت ترمنځ اړیکه، د ننګونو له منځه وړل او د نظام د اغیزمنو پروګرامونو پوښښ ده.
 د هغه په وينا، د فراه ولایت په هر ګوټ کې د خبرونو د  تولید په برخه کې د دې ولايت د خبريالانو پر وړاندې کومه ننګونه نه ده رامنځته شوې، مسؤلینو تل د خبريالانو ملاتړ کړى او د هغوى له لارې يې خپلو کړنو ته پوښښ ورکړی دی.
 د غونډې په پای کې د افغانستان د خبریالانو د ملي ټولنې له لوري د فراه ولايت د رسنيو مسؤلينو او يو شمیر خبريالانو ته ستاينليکونه ورکړل شول او غونډه په دعايې سره پای ته ورسیده.
۱۴۴۴/۱۰/۱۳ ه ق
۱۴۰۲/۲/۱۳ ه ش