په غزني ولايت کې د سلطان محمود غزنوي ياد غونډه جوړه شوه
تېره شنبې ورځ ۱۴۴۴/۱۰/۸ هـ ق په غزني ولايت کې د سلطان محمود غزنوي د شخصيت او کارنامو د يادونې په موخه د روضې کلي د ټولنيزې شورا په همکارۍ د دغه ولایت د اطلاعاتو او کلتور ریاست په مشرۍ غونډه، جوړه شوه.
په جوړه شوې غونډه کې، د اطلاعاتو او کلتور رياست د اطلاعاتو آمر مولوي درمحمد فدايي، د روضې د کلي د ټولنيزې شورا رئيس او ځوانانو ګډون کړى و.
د غونډې په پیل کې د غزني ولایت د اطلاعاتو او کلتور رئس ښاغلي نثار خبرې وکړې او ویې ويل، چې دغه رياست په پام کې لري چې د ولسونو، مشرانو او د ولایت مقام په همکارۍ به په نږدې راتلونکي کې د غزنوي دور د ستر امپراتور سلطان محمود غزنوي د جهادي او سیاسي شخصیت په اړه یوه ستره غونډه ترسره کړي.
د روضې کلي د ټولنيزې شورا رئيس حاجي عبدالمنان د غزني ولایت د اطلاعاتو او کلتور رياست د دغه اقدام ستاينه وکړه او په دې برخه کې يې د هر ډول همکارۍ ډاډ ورکړ.
