په جوزجان کې د رسنيو له مسؤلينو او خبريالانو سره د همږغۍ ناسته وشوه
د جوزجان ولایت د اطلاعاتو او کلتور ریاست په همکارۍ د افغان خبریالانو د خونديتوب کمېټې لخوا د رسنیو له مسؤلینو او خبريالانو سره د همږغۍ ناسته وشوه.
په دې ناسته کې چې د اطلاعاتو او کلتور رئیس مولوي سیف الدین معتصم، د شمال زون لپاره د افغان خبریالانو د خونديتوب کمېټې مسؤل عبداللطیف سهاک، د دولتي او خصوصي رسنیو مسؤلینو په ګډون جوړه شوې وه، د اړیکو د پیاوړتیا لپاره بحث او خبرې وشوې.
مولوي سیف الدین معتصم د اسلامي امارت لاسته راوړنو ته په اشارې وویل: د اسلامي امارت د واکمنېدو وروسته په هېواد کې سرتاسري امنیت ټینګ شوی او په بېلابېلو برخو کې د پام وړ پرمختګونه شوي دي، نوموړي زیاته کړه؛ رسنۍ د حکومت او ولس ترمنځ د اړیکو پل او د نظام ژبه ګڼل کېږي، نو اړتیا ده چې د واقعیتونو انعکاس او د هېواد رښتینی انځور وړاندې کړي.
د شمال زون لپاره د افغان خبریالانو د خونديتوب کمېټې مسؤل عبداللطیف سهاک د اطلاعاتو او کلتور ریاست د رسنیو او خبریالانو د ملاتړ ستاینه وکړه او ویې ویل: د جوزجان دولتي او خصوصي رسنۍ په وخت سره د راپورونو او پروګرامونو وړاندې کولو له لارې د دې ولایت د پېښو په انعکاس او خلکو ته د معلوماتو رسولو کې مهم رول لوبوي.
په دې ناسته کې خبریالانو او د رسنیو مسؤلینو خپلې ستونزې او وړاندیزونه شریک کړل، چې د جوزجان د اطلاعاتو او کلتور د رئیس له لوري يې د حل کولو ډاډ ورکړل شو.
۱۴۴۶/۶/۲۲ هـ ق
۱۴۰۳/۱۰/۴ هـ ل
