په بغلان کې د ګرځندوی صنعت د ودې لپاره هڅې روانې دي

د بغلان ولایت د اطلاعاتو او کلتور رياست د کلتور او ګرځندوی آمر وایي، د روان کال په بهير کې څه دپاسه يو ميليون افغانۍ د ګرځندویانو نه راټولې شوې او بانک ته جمع شوې دي.
د کلتور او ګرځندوی آمر مولوي عزت مير حقاني چې د ګرځندوی د نړيوالې ورځې په مناسبت يې د مرکزي بغلان ولسوالۍ له سياحتي سيمو څخه ليدنه وکړه وایي،
سږ کال دغې ادارې د ګرځندوی شرکتونو او د ګرځندوی صنعت ته د فعالیت جوازونو د ورکړې له لارې یو میلیون افغانۍ راټولې کړې او د دولت خزانې ته یې سپارلې دي.
د ښاغلي حقاني په خبره، په روان کال کې څه د پاسه درې زره کورنيو او بهرنيو سيلانيانو د بغلان له سياحتي ځايونو څخه ليدنه کړې او له دې لارې دولت او خلکو ته چې په سياحتي سيمو کې اوسېږي ښه عوايد ترلاسه شوي دي.
ښاغلی حقاني زیاتوي بغلان يو له هغو ولايتونو څخه دی، چې له سياحتي او تاريخي ځايونو څخه ډک دى او سيلانيان کولاى شي په ډاډمنه فضا کې له دغه ولايت څخه ليدنه وکړي.

۱۴۴۵/۳/۱۲ هـ ق
۱۴۰۲/۷/۵ هـ ش