په بدخشان ولایت کې د کتابونو نندارتون جوړ شو
په بدخشان کې د يوه خصوصي کتاب پلورنځي مسوول احمد نبیل قاضي زاده د دغه ولايت د اطلاعاتو او کلتور او پوهنې رياستونو په همغږۍ په ټولنه کې د لوستلو کلتور د دودولو په موخه د سرک په سر د کتابونو نندارتون جوړ کړ.
د اطلاعاتو او کلتور رياست رئيس انجینر ذبیح الله اميري په نندارتون کې د ګډون پر مهال له دا ډول نندارتونونو جوړولو ملاتړ څرګند کړ او ويې ویل: دا ډول نندارتونونه په ټولنه مثبت اغېز کوي، بدخشان د شاعرانو او فرهنګيانو ټاټوبی دی، نوموړي د ياد ولايت په بېلابېلو برخو کې د بدخشان د ادب او کلتور ژوندي ساتلو په موخه د فرهنګيانو له لوري د ادبي او فرهنګي ناستو په جوړولو ټينګار وکړ.
د ياد نندارتون جوړونکي احمد نبیل قاضي زاده وویل: دا نندارتون يې په ټولنه کې د کتاب لوستنې دود عامولو په موخه جوړ کړی دی، چې دوه ورځې به دوام وکړي، خلک په ځانګړي ډول ځوانان کولای شي په دې نندارتون کې له دوه زره ټوکه کتابونو څخه ګټه واخلي.
۱۴۴۶/۴/۱۰ هـ ق
۱۴۰۳/۷/۲۲ هـ ل
