ټولنیزې رسنۍ دې داسې مطالب نشر کړي چې د دین او وطن په ګټه وي
یادې څرګندونې تېره ورځ د لغمان د اطلاعاتو او کلتور رئیس مولوي عبدالنور رسولي، د هیرو انلاین ټي وي د ۸ مې کلیزې په نمانځغونډه کې وکړې.
ښاغلي رسولي له هیرو ټي وي څخه د مننې ترڅنګ د نورو ټولنیزو رسنیو په کارکوونکو ږغ وکړ، چې له خپلو پاڼو داسې مطالب نشر کړي، چې مثبت پیغام لیږدوي او خلکو ته ګټور وي.
ښاغلي رسولي زیاته کړه، زموږ ولس ډیر کلونه د جنګونو او وژنو خبرونه اورېدلي له دې وروسته باید هره رسنۍ مثبت، ګټور له پرمختګ او خوښیو ډک نشرات وکړي.
ورپسې د ولایت مقام استازي رفیع الله رفیع د هیرو ټي وي له مشر عنایت الله هیرو څخه مننه وکړه، چې په آنلاین بڼه یې خپلو خلکو ته تل مثبت پیغامونه رسولي دي، هغه وویل هیرو له تیرو ۸ کالو راهیسې په آنلاین بڼه نشرات کوي چې تل یې بیلابیلو پیښو ته مثبت انعکاس ورکړی دی.
۱۴۴۴/۸/۲۷ هـ ق
۱۴۰۱/۱۲/۲۹ هـ ش
