هرات کې د رسنيو د وضعیت د ښه والي په موخه ناسته ترسره شوه
چهارشنبه( ۲۴ د رمضان المبارک ۱۴۴۵) د هرات ولايت په اطلاعاتو او کلتور رياست کې د رسنيو له مسؤلینو سره د رسنيو د وضعیت د ښه والي په موخه ناسته ترسره شوه.
د رسنيو مسؤلينو د رسنيو د ستونزو د بیانولو په وخت وويل: دا مهال د رسنيو یواځينۍ ستونزه اقتصادي ستونزې دي، چې د صنعتي شرکتونو مسؤلين د اعلانونو په ورکولو له دوی سره په دې برخه کې همکاري کولای شي، همداراز يې د اطلاعاتو او کلتور له رئيس څخه وغوښتل تر څو دوی ددی مالي لاسنيوی وکړي.
د هرات د اطلاعاتو او کلتور رئيس مولوي احمدالله متقي وويل: ددوی اداره هڅه کوي، تر څو رسنيو او خبریالانو ته د کار او فعالیتونو ښه شرايط برابر کړي، د ا.ا.ا. په هر ډول شرایطو کې له قانون سره سم له رسنیو او خبریالانو څخه ملاتړ کوي.
ښاغلي متقي له دوی څخه وغوښتل چې د کلتوري پروګرامونو په پراختيا او وده کې له اطلاعاتو او کلتور ریاست سره خپله همکاري نوره هم زياته کړي.
د يادونې وړ ده چې هرات ولایت کې دا مهال ۳۱ غږيزې او تصويري رسنۍ فعاليت کوي.
