هرات کې د بهزاد نگارستان په نوم هنري نندارتون جوړ شو
د هرات اطلاعاتو او کلتور ریاست په همکارۍ د استاد کمالالدین بهزاد انسټیټیوټ له لوري د بهزاد نگارستان په نوم هنري نندارتون جوړ شو.
د یاد انسټیټیوټ مسؤلین وایي، چې په دغه اونیز نندارتون کې د میناتورۍ، خطاطۍ او نقاشۍ ۹۴ هنري آثار نندارې ته وړاندې شول.
د نندارتون جوړوونکو په وینا؛ د دې نندارتون جوړولو څخه موخه د ځوانو هنرمندانو د استعدادونو پیژندنه او د هغوی د خلاقیتونو ښکاره کول دي.
ورته مهال د هرات د اطلاعاتو او کلتور ریاست اړوند د فرهنګ او هنر آمر د دې نندارتون جوړولو څخه د ملاتړ ترڅنګ وویل: د اطلاعاتو او کلتور ریاست تل د ورته هنري پروګرامونو ملاتړ کوي، د اطلاعاتو او کلتور ریاست هڅې کوي، چې ټولنې ته د نقاشۍ، خطاطۍ او مینیاتورۍ په برخو کې هنري ظرفیتونه د پراخو امکاناتو برابرولو او ملاتړ له لارې لا ښه وروپیژني.
د یادونې وړ ده، چې دا مهال د استاد کمالالدین بهزاد انسټیټیوټ کې ۴۰ تنه زده کوونکي د نقاشۍ او خطاطۍ په برخو کې زده کړې کوي او مسوولینو هیله وښوده، چې د دوی د هنري آثارو نندارې سره به نور ځوانان هم د دغه هنرونو لور ته وهڅول شي.
۱۴۴۷/۶/۶ ه ق
