هرات کې د انګلیسي ژبې نوي ټولګي پيل شول

د هرات ولایت د اطلاعاتو او کلتور ریاست د ځوانانو چارو آمریت په وړيا ښوونيز مرکز کې د انګلیسي ژبې د زده کړې نوې دوره د ۱۰۰ څخه زیاتو ځوانانو په ګډون پيل کړه.
د ځوانانو چارو آمر مولوي عبدالمتین عادل د دغو ټولګیو د پرانیستې پر مهال له ځوانانو وغوښتل، چې له تعلیمي فرصتونو څخه ښه ګټه واخلي او خپل مهارتونه لا پیاوړي کړي.
نوموړي زیاته کړه، دا وړیا زده کړې د ځوانانو اړتیاوو ته په کتو د مجربو استادانو تر نظارت لاندې ترسره کېږي.
د دې ښوونيزې دورې ښوونکي وايي: انګلیسي ژبه به په پرمختللي ډول تدریس کړي، ترڅو ګډونوال وکولای شي، په لنډ وخت کې اړین مهارتونه ترلاسه کړي.
د يادونې وړ ده، چې د دې دورې تر څنګ د ځوانانو چارو آمریت په وړيا ښوونيز مرکز کې د کمپیوټر، خوش‌ نويسۍ، لومړنیو مرستو او وینا فن په ګډون نورې تعلیمي دورې هم روانې دي، چې د ځوانانو له پراخ هرکلي سره مخ دي.

۱۴۴۶/۸/۲۳ ق
۱۴۰۳/۱۲/۴ ل