ننګرهار کې د عالیقدر امیرالمؤمنین حفظه الله د فرامینو د عامه پوهاوي په موخه ولسي غونډه وشوه
د ننګرهار ولایت د اطلاعاتو او کلتور ریاست له لوري د دغه ولایت په شېرزادو ولسوالۍ کې د عاليقدر اميرالمؤمنين حفظه الله د فرامینو او حکمونو د لا ښه پلي کولو او عامه پوهاوي په موخه ولسي غونډه جوړه شوه، چې پکې د اطلاعاتو او کلتور ریاست د مسؤلینو ترڅنګ د شېرزادو ولسوال، دیني علمای کرامو، قومي مشرانو او ځوانانو ګډون کړی وو.
د اطلاعاتو او کلتور رئیس مولوي ذبيح اللّه نوراني وويل: له کلونو قربانۍ وروسته الله تعالی موږ ته د اسلامي نظام ستر نعمت راکړ، اوس مهال زموږ مسؤليت دی، چې د عالیقدر اميرالمؤمنين حفظه الله د فرامينو او لارښوونو په عملي کولو سره د نظام بنسټونه لا پياوړي کړو، ځکه د دغو فرامينو موخه د ټولنې نېکمرغي، د ناوړه دودونو مخنيوی او د نارينه او ښځو د شرعي حقونو تامين دی.
د شېرزادو ولسوال مولوي مرتضی خالد، د ځوانانو چارو آمر او د غونډې نورو ويناوالو د عالیقدر اميرالمؤمنين حفظه الله د فرامينو په پلي کېدو او د اسلامي نظام په پياوړتيا ټينګار وکړ او ویې ویل: د دغو فرامینو عملي کول پر هر مسلمان واجب دي، دغه فرامين د خلکو د سوکالۍ او د ناوړه دودونو له منځه وړلو په موخه صادر شوي دي، ټولنه کې عدالت پياوړی کوي او بې شمېره خير او برکات لري.
په پای کې د غونډې ګډونوالو ته د اميرالمؤمنين د ۱۷ مه ګڼه فرمان په چاپي بڼه ورکړل شو او ټولو ګډونوالو ژمنه وکړه، چې د دغو لارښوونو د عملي کولو لپاره به د اسلامي امارت تر شا ولاړ وي.
۱۴۴۷/۵/۱۳ هـ ق
