لوګر کې د خبریالانو د خوندیتوب او همغږۍ ناسته وشوه

د لوګر ولایت د اطلاعاتو او کلتور ریاست له لوري د خبریالانو سره د خوندیتوب او همغږۍ ناسته تر سره شوه.
په یاده ناسته کې د ملي راډیو تلویزیون آمر، د امر بالمعروف او نهي عن المنکر ریاست ویاند، د خبریالانو د خوندیتوب کمېټې، د افغانستان د ژورنالیستانو د ملي اتحادیې استازو او د رسنیو مسؤلینو ګډون کړی وو.
په پیل کې د اطلاعاتو آمر امین الله صفا په دې ولایت کې د رسنیو سرغړونې ته د رسېدنې کمېټې پر تړاو هر اړخیز معلومات وړاندې کړ.
ور پسې د اطلاعاتو او کلتور ریاست رئیس رفیع الله صمیم خبرې وکړې او ویې ویل، زموږ او ستاسو ګډ مسؤلیت دی، چې د اسلامي او افغاني کلتور د ودې لپاره کار وکړو او هغه پروګرامونه او خپرونې ټولنې ته وړاندې کړو، چې ولس یې غواړي او ځوانانو ته مثبت او ښه انګېزه ورکوي.
ورته مهال د ملي راډیو تلویزیون، او ملي پيوند راډیو، مسؤلینو په خپلو خبرو کې د رسنیو سرغړونو ته د رسېدنې  کمېټې پر جوړېدو خوښي څرګند کړه او ترڅنګ یې ډاډ ورکړ، چې خپل پروګرامونه او خپرونې به د اسلامي او افغاني ارزښتونو په پام کې نیولو سره چمتو کوي.

۱۴۴۵/۱/۷ هـ ق
۱۴۰۲/۵/۲ هـ ش