لومړي ځل لپاره د لوګر محلي موزیم آثار برېښنايي (ډیجیټل) شول
د لوګر اطلاعاتو او کلتور ریاست مسؤلین وايي: د لومړي ځل لپاره په محلي موزیم کې موجود آثار په برېښنايي (ډیجیټل) او درې بعدي ډول سکین شول.
د اطلاعاتو او کلتور ریاست اړوند د محلي موزیم مدیر په وينا؛ د اطلاعاتو او کلتور وزارت د هدایت په اساس او د ESAO موسسې په همکارۍ څه باندې ۹۰ قلمه تاریخي او فرهنګي آثار برېښنايي او په درې بعدي ډول سکین شول.
د موزیم مدیر زیاته کړه؛ د دغو اثارو له برېښنايي کولو څخه موخه د تاریخي او فرهنګي آثارو ساتنه ده.
د یادونې وړ ده، چې د لوګر محلي موزیم کې اوس مهال له ملي موزیم سره ثبت ۱۰۹ قلمه بېلابېلو دورو پورې اړوند اثار موجود دي.
۱۴۴۷/۶/۱۹ هـ ق
