له وړیا ښوونیز مرکز څخه لسګونه تنه ځوانان فارغ شول

د غور ولایت د اطلاعاتو او کلتور ریاست د ځوانانو چارو آمریت اړوند وړیا ښوونیز مرکز له درې میاشتنيو کمپیوټر او انګلیسي ژبو ټولګیو څخه ۵۵ تنه ځوانان فارغ او د فراغت سندونه یې ترلاسه کړل.
د اطلاعاتو او کلتور رئیس مولوي عبدالحی زعیم د ځوانانو د اهمیت او رول په اړه هراړخیزې خبرې وکړې او ویې ویل: اوس مهال له بل هروخته د ځوانانو ظرفیت لوړونې لپاره غوره شرایط برابر شوي دي، اسلامي امارت د ځوانانو دیني او عصري علومو زده کړو په برخو کې پوره هلې ځلې کوي، ترڅو په راتلونکي کې د ټولنې په ټولو برخو کې تقوا لرونکی او مسلکي نسل خدمت وکړي.
دغه راز د ځوانانو چارو آمر وویل: د یاد ښوونیز مرکز دا څلورمه دوره فراغت غونډه ده، چې لسګونه تنه زده کوونکي د کمپیوټر او انګلیسي ژبې له دریو میاشتنیو ټولګیو څخه فارغ او د فراغت سندونه ترلاسه کوي.
ورته مهال فارغ شويو ځوانانو د اطلاعاتو او کلتور ریاست له لوري د زده کړو په برخه کې له دغو اسانتیاوو برابرولو څخه مننه وکړه او ویې ویل: د دریو میاشتو په لړ کې مو وکولای شول، چې د کمپیوټر بېلابېل پروګرامونه او د انګلیسي ژبې په برخه کې زده کړې وکړو، له ترلاسه کړو زده کړو څخه به په ښه توګه استفاده وکړو.

۱۴۴۷/۶/۱۰ هـ ق