لغمان کې د رسنیو له مسؤلینو سره د همغږۍ ناسته ترسره شوه
دوشنبه (۲ د شعبان ۱۴۴۵) لغمان کې د اطلاعاتو او کلتور د رئیس مولوي عبدالنور رسولي په مشرۍ د رسنیو له مسؤلینو سره د همغږۍ ناسته ترسره شوه.
د اطلاعاتو او کلتور رئیس د رسنیو مسؤلینو ته له ښه راغلاست وروسته وویل: خوښ یم چې یو ځل بیا تاسو سره ګورم، د ناستې موخه همغږي او د خپرونو په موخه نظریات شریکول دي، موږ ستاسو د فعالیتونو ستاینه کوو.
ښاغلي رسولي زیاته کړه؛ رسنۍ دې کوشش وکړي د هېواد په تاریخي ورځو، د مجاهدینو په قربانیو او اسلامي شریعت ته په کتو خپرونې جوړې کړي، نوموړي همداراز د رسنیو له مسؤلینو وغوښتل چې د دلوې د ۲۶ مې نېټې په پار هم ځانګړي راپورونه او مرکې جوړې کړي.
د رسنیو مسؤلینو د اطلاعاتو او کلتور ریاست څخه مننه وکړه چې وخت پر وخت ورسره د همغږۍ ناستې جوړوي، دوی وویل: د اطلاعاتو او کلتور ریاست ټولو غوښتنو او سپارښتنو ته به پاملرنه کوي، همداراز یې خپلې یو شمېر غوښتنې د اطلاعاتو او کلتور رئیس سره شریکې کړې چې د حل ډاډ یې ورکړل شو.
