لغمان کې د امام ابوحنيفه رح په ننګه د سیالی پايلې اعلان شوې

د لغمان ولايت د اطلاعاتو او کلتور رياست او الصارم فکري او کلتوري ادارې له لوري په قرغيو ولسوالۍ کې د شاوخوا ۵۰۰ تنو ځوانانو ترمنځ د امام ابوحنیفه رح په ننګه سيالي ترسره شوې وه، چې پايلې يې د يوې غونډې په ترڅ کې اعلان او غوره ګډونوال يې د ډاليو په ورکولو سره ونازول شول.
د اطلاعاتو او کلتور رئیس مولوي عبدالنور رسولي غونډې ته د وينا پر مهال وویل: ددې سیالیو موخه د ځوانانو فکري اصلاح، روزنه، تعلیمي سویه لوړول او ترڅنګ یې ځوانان مطالعې ته تشویقول دي.
نوموړي همداراز د اسلامي نظام په ګټو، ارزښت او د امارتي مشرانو په قربانیو خبرې وکړې، او زیاته یې کړه؛ اسلامي امارت د ولس د ښېرازۍ، فکري اصلاح او پرمختګ لپاره په پراخه کچه هڅې پیل کړي، ترڅو اسلامي نظام حاکم او ولس خوندي وساتل شي.
 د يادې ولسوالۍ د معارف آمر د اطلاعاتو او کلتور ریاست څخه مننه وکړه، چې د ځوانانو د اصلاح په خاطر دا ډول برنامې جوړوي، تر څنګ یې د داسې پروګرامونو په ارزښت هم مفصلې خبرې وکړې.
په پای کې مخکښ ګډونوال په ډالیو ونازول شول، لومړي او دوهم مقام ګټوونکو ته لپټاپ کمپیوټرونه، دریم مقام ګټونکي ته ساعت او په پرلپسې توګه تر ۱۴۰ ګډونوالو پورې جایزې ورکړل شوې.

۱۴۴۶/۰۸/۱۷ ق
۱۴۰۳/۱۱/۲۸ ل