فراه کې د خبريالانو د خوندیتوب کمېټې له رئیس او خبريالانو سره ليدنه وشوه

د فراه ولايت والي مولوي غوث الدين رهبر د دغه ولایت د اطلاعاتو او کلتور رياست د رئیس محمد عبدالحي سباوون په ګډون په لويديځ زون کې د خبريالانو د خوندیتوب کمېټې له مسؤل شميل احمد مشعل او د فراه ولايت له یو شمیر خبريالانو سره په ليدنه کې د حقيقتونو پر خپرولو او تر نورو پورې په رسولو باندې ټينګار وکړ او زياته يې کړه، ټول مسؤلين په دي مکلف دي چې د خبريالانو د ساتنې او امنيت نيولو ترڅنګ دوی ته پر وخت اطلاعات ورکړي.
نوموړي همدارنګه خبريالان د هېواد د سترګو او غوږونو په ډول وبلل او زياته يې کړه؛ خبريالان بايد تل د بشپړې همغږۍ په درلودلو سره د حقيقت په لټه کې وي او تر خلکو پورې هغه څه ورسوي، چې د نظام پايښت، ملاتړ او ګټه پکښې خوندي وي.
ښاغلي رهبر همدارنګه خبريالانو ته د هر اړخيزه ملاتړ او د همکارۍ کولو د ډاډ ترڅنګ وویل: اسلامي نظام دې ته بشپړ ژمن دی، چې خبريالانو ته هر ډول اسانتياوې رامنځته کړي.
بل خوا په لويديځ زون کې د خبريالانو د خوندیتوب کمېټې مسؤل شميل احمد مشعل بيا اطلاعاتو ته د پر وخت رسيدلو، تر ولسي وګړو پورې د نظام د لاسته راوړنو د رسولو، حقيقتونو خپرولو، د يو شمير بهرنيو رسنيو له لوري د دروغجنو خبرونو د خپريدلو د مخنيوي په موخه په فراه ولایت کې د خبريالانو لپاره د ټولو ادارو له لوري د وياند او نشراتي مسؤل د ټاکلو غوښتنه وکړه او دا يې نه يوازې اړتيا وبلله، بلکې خبريالانو ته د اطلاعاتو د لاس رسي لپاره يې اغيزمن ګام هم وباله.

۱۴۴۶/۳/۲۷ هـ ق
۱۴۰۳/۷/۹ هـ ش