فاریاب کې سلګونو تنو ځوانانو ته د وړیا زده کړو زمینه برابره شوه

د فاریاب ولایت د اطلاعاتو او کلتور ریاست اړوند د ځوانانو چارو آمریت مسؤلین وايي، چې نږدې ۳۵۰ تنو ځوانانو ته د عربي ژبې، انګلیسي ژبې، کمپیوټر پروګرامونو او خطاطي هنر په برخه کې د وړیا زده کړو زمینه برابره شوه.
د ځوانانو چارو آمر وویل: د اطلاعاتو او کلتور ریاست اړوند وړیا ښونیز مرکز په دغې دورې کې نږدې ۳۵۰ تنه ځوانان شامل شوي دي، چې په یادو څلور برخو کې به یې علمي او مسلکي ظرفیتونه لوړ شي.
د ځوانانو چارو آمر زیاته کړه، له یاد پروګرام څخه موخه د ځوانانو د ظرفیتونو او نوښتونو پیاوړتیا او د ټولنې روښان راتلونکي ته د ځوانانو چمتو کول دي او د اطلاعاتو او کلتور ریاست هڅې کوي، چې ځوانانو ته په وړیا او لا غوره توګه ورته نور پروګرامونه هم جوړ کړي.
د اطلاعاتو او کلتور ریاست اړوند ښوونیز مرکز د دغې دورې زده کوونکو هم د زده کړو له کیفیت څخه پوره رضایت څرګند کړ.
۱۴۴۷/۶/۱۸ هـ ق