فاریاب کې د مشاعرو د تنظیم قانون تشریح لپاره سیمینار جوړ شو

د فاریاب ولایت د اطلاعاتو او کلتور ریاست له لوري د امیرالمؤمنین حفظه الله ۲۲ مه ګڼه فرمان چې د مشاعرو د تنظیم قانون په موخه صادر شوی دی، شاعرانو، لیکوالانو، ترانه ویوونکو او ادیبانو ته د سیمینار په ترڅ کې تشريح شو.
د سیمینار په پیل کې د فاریاب ولایت د اطلاعاتو او کلتور رئیس مولوي شمس الدین محمدي ګډون کوونکو ته د ښه راغلاست ویلو ترڅنګ یاد قانون په هر اړخيزه توګه تشریح کړ او ویې ویل: په دې قانون کې د شعر، شاعرۍ، او د مشاعرو ترسره کولو په اړه دقیق او روښانه معلومات بیان شوي دي.
نوموړي زیاته کړه، د اسلام مبارک دین شعر او شاعرۍ ته لوړ ارزښت او لوړ مقام ورکړی دی، په همدې موخه اړینه ده، چې شاعران د خپل شعر محتوا د دیني او ملي ارزښتونو په اساس برابره کړي.
همدارنګه د فاریاب ولایت د علماوو شورا استازي مولوي عبدالودود ارشد هم د اسلامي امارت د رهبرۍ له لوري شعر او ادب ته ارزښت ورکولو په اړه خبرې وکړې او د دغه قانون توشیح یې د شاعرانو ټولنې ته یو ګټور او مثبت ګام وباله.
د شاعرانو په استازولۍ حمیدالله بوتون حیدري خبرې وکړې او د دغه قانون له تصویب او توشیح څخه یې هرکلی وکړ.

۸/۲/۱۴۴۷ هـ ق