غور کې د غوریانو دورې اړوند یو شمېر طلایي سکې کشف شوې دي
د غور ولایت د اطلاعاتو او کلتور ریاست مسؤلین وايي، چې د غوریانو د حکومت دورې اړوند ۶۰ طلایي سکې چې بعضې یې نیمه تخریب شوي، د یوې کوزې سره په لاس راوړي دي.
د اطلاعاتو او کلتور رئیس مولوي عبدالحی زعیم وویل: دا سکې او کوزه چې د غوریانو حکومت دورې پورې اړوند دي، د دې ولایت الله یار ولسوالۍ کې د سړک جوړولو د چارو په مهال موندل شوي دي.
نوموړي زیاته کړه، چې د دې سکو مجموعي ارزښت تراوسه معلوم نه دی، خو تاریخي قدامت یې د غوریانو حکومت دورې ته رسېږي.
د ویلو وړ دی، چې دا سکې د اسلامي امارت د ځانګړو ځواکونو له لوري له یاد ځای څخه راټول شوي دي، چې رسما د دوی له لوري د غور د اطلاعاتو او کلتور ریاست موزیم ته وسپارل شول.
۱۴۴۶/۱۲/۷ هـ ق
