غزني کې درې تاريخي آبدې د بيارغونې په موخه سروې شوې
سهشنبه (۱۶ د رمضان المبارک ۱۴۴۵) د اطلاعاتو او کلتور وزارت د تاريخي آبداتو رياست د مسلکي ټيم له لوري د غزني ولايت درې تاريخي آبدې د بيا رغونې په موخه سروې شوې.
د غزني ولايت د اطلاعاتو او کلتور رئيس ملا حميد الله نثار وويل: د وزارت مقام په هدایت د تاريخي آبداتو رياست د مسلکي انجينرانو ټيم د ياد ولايت په مرکز کې د سلطان مسعود د مقبرې، د سردار تپې ساحه او په ده يک ولسوالۍ کې د سلطان شهاب الدين غوري د مقبرې د سروې په موخه رااستولي و، چې په مسلکي ډول يې د سروې کارونه پای ته ورسېدل، چې د زيانونو راپور يې برابر او د وزارت مقام سره به يې شريک کړي.
ښاغلي نثار د انجينرانو د ټيم کارونه وستايل او زياته يې کړه؛ د غزني د تاريخي آبداتو په بيارغولو سره به دې ولايت ته د بهرنيو او کورنيو سيلانيانو توجه نوره هم زياته شي.
د نوموړي په وينا؛ د تېرو شلو کلونو په ترڅ کې د غزني د تاريخي ځايونو د ساتنې او بيارغونې لپاره هېڅ ډول مسلکي کار نه دی ترسره شوی.
