غزني د اطلاعاتو او کلتور ریاست له ښوونیز مرکز څخه لسګونه تنه زده کوونکي فارغ شول

نن شنبه (۱۴۴۵/۲/۲۴ هـ ق) د غزني ولایت د اطلاعاتو او کلتور ریاست له ښوونیز مرکز څخه ۴۰ تنه زده کوونکي د کمپیوټر پرګرامونو له زده کړې څخه فارغ شول.
په دې اړه د دغه ولایت د اطلاعاتو او کلتور رئیس ملا حمیدالله نثار وایي: یادو زده کوونکو ۶ میاشتې د دغه ریاست په ښوونیز مرکز کې په وړیا توګه زده کړې ترسره کړې او نن یې د فراغت سندونه تر لاسه کړل.
ښاغلی نثار زیاتوي، ځوانانو ته د زده کړې د لاښه فرصتونو د برابرولو په موخه، غواړي چې دا ډول وړیا ښوونیز مرکزونه، د غزني لرې پرتو ولسوالیو ته هم وغځوي. 
د دغه ریاست د مسؤلینو په خبره، د ا.ا.ا. له بریا څخه تر دې مهاله، له دغه ښوونیز مرکز څخه نږدې ۱۵۰۰ زده کوونکي په وړیا توګه فارغ شوي او همدا اوس هم په دغه مرکز کې څه باندې ۱۰۰ تنه زده کوونکي په زده کړو بوخت دي.
د یادونې وړ ده، چې په غزني ولایت کې د اطلاعاتو او کلتور رئیس ملا حمیدالله نثار او د مسلم روغتیایي علوم انستیتوت د مشر ډاکټر غني زوی تر منځ د همکارۍ هوکړه لیک، لاسلیک شو، چې له مخې به یې بې وزله ځوانان د زده کړو لپاره ور پېژندل کیږي.