سمنګانو کې د تېر په پرتله د کتاب لوستنې کلتور وده کړې
د سمنګان ولايت د اطلاعاتو او کلتور رياست مسؤولين وايي: په وروستيو کې دې ولايت کې د کتاب لوستنې کلتور د ودې په حال کې دی.
د عامه کتابتون مسؤول جان محمد اميري وويل: دې ولايت کې د کتاب لوستنې کلتور نظر تېرو کلونو ته ۶۰ سلنه زيات شوی دی، دا مهال عامه کتابتون ته ډېر شمېر خلک د کتاب لوستنې لپاره مراجعه کوي.
نوموړي زياته کړه؛ په دې ولايت کې ۱۰ بابه کتابتونونه شته چې ۶ يې د اطلاعاتو او کلتور رياست اړوند او ۴ نور يې د لوړو زده د مؤسسو او د معارف رياست اړوند دي، چې د اطلاعاتو اوکلتور رياست په کتابتونونو کې ۱۴۰۰۰ ټوکه بېلابېل کتابونه موجود دي.
همدا ډول د خلم ولسوالۍ په کتابتون کې ۲۰۰۰ ټوکه، د خرم او سارباغ کتابتون کې ۸۰۰۰ ټوکه، د حضرت سلطان کتابتون کې ۲۳۰۰ ټوکه او د دره صوف پايين کتابتون کې ۵۰۰ ټوکه کتابونه موجود دي، چې هره ورځ لسګونه ځوانان د کتاب لوستنې لپاره ورته راځي کوي.
همدا ډول د اطلاعاتو او کلتور وزارت د عامه کتابتونونو رياست له لوري د سمنګانو عامه کتابتون سره د ۴۲۶ ټوکه بېلابېلو کتابونو مرسته وشوه، يادو کتابونو کې د ديني علومو، ټولنيزو علومو، ساينسي، ادبي او د نورو برخو کتابونه شامل دي.
۱۴۴۵/۷/۱۳ هـ ق
۱۴۰۲/۱۱/۴ هـ ل
