روزګان کې له یو شمېر لیکوالانو او فعاله ځوانانو سره د همغږۍ غونډه ترسره شوه

د روزګان ولایت د اطلاعاتو او کلتور ریاست له لوري د دې ولایت له یو شمېر لیکوالانو او فعاله ځوانانو سره د همغږۍ غونډه ترسره شوه، چې پکې د فرهنګي همکارۍ، فکري مبارزې، د اسلامي ارزښتونو د ترویج او د سالمو تبلیغاتو کولو پر لارو چارو بحث وشو.
د اطلاعاتو او کلتور رئیس مولوي رحمت الله ریحان وویل: لیکوالان او ځوانان د ولسونو د افکارو جوړونکې ستنې دي، چې د نظام د پیاوړتیا لپاره د دغو قشرونو رول خورا مهم دی.
د ښاغلي ریحان په وینا؛ موږ باید د خپل ولسونو افکارو ته د اصلاح او پرمختګ مسیر برابر کړو او د فکري انحرافاتو او ناسم تبلیغاتو مخه ونیسو.
په ورته وخت کې د غونډې ګډونوالو د اسلامي نظام ملاتړ دیني او ملي مسؤلیت وبلله او ویې ویل: لیکوالانو او ځوانان باید د خپلو قلمونو، نظرونو او نوښتګرو فعالیتونو له لارې د ولسونو افکار مثبت لوري ته وهڅوي او د هر ډول منفي او بې بنسټه تبلیغاتو او افواهاتو د مخنیوي پر وړاندې مبارزه وکړي.
همدرانګه ګډونوالو زیاته کړه، چې لیکوالان باید د دښمن پروپاګند ته په نرم، مؤثر او استدلالي ډول ځواب ووايي او یو لیکوال ځوان باید نیک اخلاق، مخلص، باخبر، استقامت لرونکی او زده ‌کړیال شخصیت لرونکی وي، تر څو د اسلامي امارت لاسته راوړنې په ښه توګه تر ولسونو پورې ورسوي.
۱۷/۱/۱۴۴۷ هـ ق