د کتابونو ارزونې کمېسیون نوبتي غونډه ترسره شوه
نن دوشنبه (۱۴۴۴/۸/۲۷ هـ ق) د اطلاعاتو او فرهنګ وزارت نشراتي معینیت کې د ښاغلي معین "مهاجر فراهي" په مشرۍ د کتابونو د ارزونې کمېسیون نوبتي غونډه ترسره شوه، چې پکې د اطلاعاتو او فرهنګ وزارت د بیهقي ریاست رئيس ځانواک مفتي زاده، معارف وزارت استازي، د علومو اکاډمۍ استازي، د لوړو زده کړو وزارت د بهرنيو هيوادونو د تحصيلي اسنادو ارزونې او معادلت رياست رئیس مولوي احمد تقي او د کمېسيون نورو غړو ګډون کړی ؤ.
غونډه د قرآن کريم په مبارکو آياتونو پیل شوه، ورپسې ښاغلي معین د یاد کمېسيون کارونه مثبت ارزیابي کړل، فعاليتونه يې وستايل او د لا ښه فعالیت سپارښتنې یې ورته وکړې.
همدا راز په یاده غونډه کې د څو ټوکو بېلابېلو کتابونو ارزونه ترسره شوه، کوم چې د اسلامي ارزښتونو او افغاني عنعناتو سره سم ول، د نشر او پلور اجازه ورکړل شوه.
غونډه په دعا پای ته ورسېده.
