د کاپيسا د اطلاعاتو او کلتور رئيس له يو شمېر ليکوالانو او رسنيزو فعالانو سره وکتل
د کاپيسا ولایت د اطلاعاتو او کلتور رئيس مولوي کریم الله وثیق د قرآن کريم د پشه يي ژبې تفسیر لیکوال پوهاند عبدالمنان عطازاده، د افغانستان د آزادو ژورناليستانو د ټولنې رئيس حجت الله مجددي او یو شمېر نورو رسنيزو فعالانو سره په خپل کاري دفتر کې وکتل.
ښاغلي وثیق په پشه يي ژبې د قرآن کریم د تفسیر، څېړنې او چاپ په ارزښت خبرې وکړې او دا چاره یې د هېواد لپاره له ویاړ او عزت څخه ډکه لاسته راوړنه وبلله.
نوموړي وويل: له هغو رسنیو چې قانوني جواز ولري او د اسلامي نظام له پالیسۍ سره سم فعالیت کوي، ملاتړ کوو، رسني د اسلامي کلتور د ترويج او پياوړتیا لپاره بهتريني وسيلې دي.
د آزادو ژورناليستانو د ټولنې رئيس او رسنیزو فعالانو د کاپيسا د اطلاعاتو او کلتور ریاست له هر اړخیز ملاتړ څخه د مننې ترڅنګ ژمنه وکړه، چې خپلو رسنیزو چارو ته به د اسلامي امارت له پالیسۍ سره سم دوام ورکړي.
۱۴۴۷/۱/۲۷ هـ ق
