د ځوانانو چارو معین شاجوی ولسوالۍ ته سفر وکړ
سه شنبه ( ۱۳ د رجب ۱۴۴۶) د اطلاعاتو او کلتور وزارت د ځوانانو چارو معین مولوی محمد یونس راشد د زابل ولایت شاجوی ولسوالۍ ته د ځوانانو د ستونزو اورېدو په موخه سفر وکړ او هلته یې د یادې ولسوالۍ له سلګونو ځوانانو سره ولیدل.
مولوي محمد یونس راشد وویل: ځوانانو ته کاري فرصتونه برابرول او ښوونیز مرکزونه جوړول د ځوانانو چارو معینیت له لومړیتوبونو څخه دي او د دوی د سالمې روزنې په موخه د هیواد په کچه مختلفې برنامې په پلان کې لري، د نوموړي په خبره، غواړي د شاجوی ولسوالۍ ځوانانو ته ښوونیز مرکز فعال کړي، ترڅو ځوانان همدلته عصري زده کړې تر سره کړي.
د زابل ولايت د ځوانانو چارو آمر ملا عصمت الله شکیب اغا د ځوانانو چارو له معین څخه مننه وکړه، چې له ځوانانو سره د ليدنې په موخه یادې ولسوالۍ ته راغلی او له ټولو ځوانانو یې وغوښتل، تر څو د اسلامي نظام د ملاتړ او د هېواد د آبادۍ لپاره لاس په کار شي او ترڅنګ يې خپلو زده کړو ته زیاته پاملرنه وکړي، ځکه هېواد مو تر بل هر وخت تعلیم ته زیاته اړتیا لري.
د شاجوی ولسوالۍ ځوانانو د تحصیل او نورو بېلابېلو برخو کې غوښتنې وکړې، چې د ځوانانو چارو معین له خوا ورته د قناعت وړ ځوابونه ورکړل شول.
۱۴۰۳/۱۰/۲۵ ل
۲۰۲۵/۱/۱۴ ز
