د پکتیکا عمومي کتابتون سره د کتابونو مرسته وشوه

د پکتیکا ولايت د اطلاعاتو او کلتور رياست اړوند عمومي کتابتون سره د علومو اکاډمۍ له لوري د ديني، کلتوري او نورو بېلابېلو برخو لسګونه ټوکه کتابونو مرسته وشوه.
د اطلاعاتو او کلتور رئیس ملا محمد آمین حذیفه وویل: د دې کتابونو له راوړلو څخه یې موخه د عمومي کتابتون له ننني دور سره په سمو کتابونو غني کول، د کتاب لوستنې دود پیاوړتیا او کتاب لوستنې ته د خلکو هڅول دي. 
نوموړي زیاته کړه؛ ټول کتابونه او په ځانګړي ډول دیني کتابونه په بیا بیا لوستلو ارزي او باید ولوستل شي، ځکه کتاب لوستنه به مو په هغه څه پوه کړي، چې تر دې وړاندې پرې نه پوهېږو. 
د یادونې وړ ده، چې تر دې وړاندې هم د اطلاعاتو او کلتور ریاست په هلو ځلو د دې ولایت عمومي کتابتون لپاره زرګونه بېلا بېل ټوکه کتابونه له وزارت مقام څخه راوړل شوي، چې زده کوونکي او لوستونکي ترې ګټه پورته کوي.

۱۴۴۶/۸/۲۸ ق
۱۴۰۳/۱۲/۹ ل