د پکتیا ځاځي اریوب ولسوالۍ ته د سیلانیانو ورتګ زیات شوی
د پکتیا ولایت د اطلاعاتو او کلتور ریاست مسؤلین وایي، چې د اختر په ورځو کې د دغه ولایت ځاځي اریوب ولسوالۍ سپینې شګې او ګیوي سیاحتي سیمو ته شاوخوا ۸۵ زره سیلانیان د سیاحت او تفریح لپاره ورغلي وو.
د پکتیا اطلاعاتو او کلتور رئیس قاضي ثواب جان اسلامیار وایي، چې په دغه لوی اختر کې یې د سیلانیانو لپاره د مخابراتو، اوسیدو ځایونو، هوټلونو، اوبو او بریښنا سهولتونه رامنځته کړي وو.
د هغه په وینا په راتلونکي کې پلان لري، چې په دغه سیاحتي سیمه کې د ځانګړي هوټل او مسجد ترڅنګ د یادې ولسوالۍ لاره په اساسي ډول جوړه کړي.
بل خوا د دغه ولایت د اطلاعاتو او کلتور ریاست د ګرځندوی مسؤل ملا حبیب الرحمن حامد وایي، چې د تېر لوی اختر له لومړۍ ورځې را وروسته د هېواد له بېلابېلو ولایتونو څخه د پکتیا بېلابېلو تفریحي سیمو ته نژدې ۱۰۰ زره سیلانیان د سیاحت او تفریح لپاره راغلي وو.
۱۴۴۴/۱۲/۱۷ هـ ق
۱۴۰۲/۴/۱۴ هـ ش
