د پروان د اطلاعاتو او کلتور رئیس خپلو کارمندانو ته د عالیقدر اميرالمومنین پیغام او توصیې واورولې
نن د یوې غونډې په ترڅ کې د پروان ولایت د اطلاعاتو او کلتور رئیس مولوی شمس الرحمن صدیقي د یاد ریاست له کارمندانو سره د عالیقدر اميرالمومنين پیغام او توصیې شریکې کړې.
ښاغلي صدیقي د ا.ا.ا رهبر یو عالم، مجاهد، مهربانه، خیرخواه او د اسلامي نظام او احکامو پابند شخصیت وباله.
نوموړي زیاته کړه، د ا.ا.ا رهبر وویل، ملکي او نظامي کارکوونکي باید شعارونه پرېږدي او په عمل کې د خپل هېواد ابادۍ ته کار وکړي.
عالیقدر امیرالمومنين د اسلامي او فرهنګي ارزښتونو په ساتنې، د بدعاتو په مخنيوي او د رسول الله(صلی الله علیه و سلم) د سنتو په عملي کولو تاکيد وکړ، خلک یې يووالي، ورورولۍ او د یو بل منلو ته راوبلل او د اطلاعاتو او کلتور وزارت له رهبرۍ او ولایتي رئیسانو یې وغوښتل چې د افغانستان د خلکو جهادي ارزښتونه د تاريخ په ډول ثبت کړي.
۱۴۴۴/۱۱/۲۹ هـ ق
۱۴۰۲/۳/۲۸ هـ ش
