د هنر او فرهنګ معین د یونسکو سازمان کلتوري رئیس سره وکتل

د اطلاعاتو او کلتور وزارت د فرهنګ او هنر معین ښاغلي مولوي عتیق الله عزیزي  د یونسکو سازمان کلتوري رئیس سره وکتل، چې په یاده ناسته کې د یونسکو سازمان رئیس برنډن او د جاپان هېواد د تاریخي او فرهنګي چارو کارپوه دوکتور یوموچي هم ګډون درلود. 
د هنر او فرهنګ معین  د یونسکو نړيوال سازمان او د جاپان هېواد له ګډو فرهنګي همکاریو او فعالیتونو څخه مننه او قدرداني وکړه او ويې ویل: د یونسکو فرهنګي برخه په افغانستان کې ګڼې تاریخي او فرهنګي پروژې تر کار لاندې لري، چې د افغانستان فرهنګي میراثونو د ساتنې او استحکام په برخه کې خورا ارزښتمنې دي. 
دغه راز ښاغلي مولوي عتیق الله عزیزي په خاص ډول د دوکتور یوموچي چې د فرهنګي میراثونو متخصص ده او په افغانستان کې له ډیرې مودې راهیسې د تاریخي او فرهنګي میراثونو د خوندیتوب او ودانولو هلې ځلې کوي قدرداني وکړه.   
په یاده ناسته کې ټینګار وشو، چې د افغانستان د تاریخي ساحو د ژغورنې، بیارغونې، د فرهنګي سیمینارونو تنظیم، د هنري پروګرامونو پراختیا او د کلتوري برخې د ظرفیت لوړولو په اړه ګټور ګامونه پورته کړل شي.

۱/۶/۱۴۴۷ هـ ق