د هلمند ښوونیز مرکز څخه په پنځمه دوره کې سلګونه ځوانان فارغ شول
د هلمند ولایت د اطلاعاتو او کلتور ریاست اړوند وړیا ښوونیز مرکز څخه په پنځمه دوره کې ۴۳۰ تنه ځوانان د کمپیوټر، عربي او انګلیسي ژبو شپږ میاشتنیو وړیا زده کړو څخه د یوې شاندارې غونډې پر مهال فارغ شول.
یاده غونډه کې د ولایت مقام د دفتر رئیس مولوي عبدالرحمن حذیفة، د اطلاعاتو او کلتور رئیس حافظ عبد الباري راشد، د پوهنې رئیس مولوي محمد عوض انصاري، د دولتي او خصوصي پوهنتونونو استادانو، سلګونه تنه زده کوونکو او ګڼ شمېر خلکو ګډون کړی وو.
د ځوانانو چارو آمر له فارغ شويو زده کوونکو څخه مننه وکړه، چې خپل درسونه یې په پوره اخلاص سره تر دې ځایه را ورسول، نوموړي له ټولو زده کوونکو څخه غوښتنه وکړه، چې دلته زده کړي درسونه تر نورو هم ورسوي، تر څو ټولنه کي د علم رڼا خپره شي، د نوموړي په وينا؛ له وړیا ښوونیز مرکز څخه په پنځمه دوره کې له کمپیوټر برخې څخه ۳۸۹ د عربي ژبې څخه ۳۵ او انګلیسي ژبې څخه ۶ تنه چې ټول ۴۳۰ تنه کیږي، فارغ شوي دي.
د غونډې په وروستیو کې د اطلاعاتو او کلتور ریاست له لوري د وړیا ښوونیز مرکز استادانو ته د مادي او معنوي ډالیو ورکولو ترڅنګ فارغ شویو زده کوونکو ته تصدیق پاڼي ورکړل شوې.
۱۴۴۶/۱۰/۲۹ ق
