د هلمند اطلاعاتو او کلتور رياست ته سلګونه ټوکه کتابونه ډالۍ شول
د هلمند ولايت اطلاعاتو او کلتور رياست ته د يو تن سوداګر له لوري سلګونه ټوکه کتابونه ډالۍ شول.
یاد کتابونه چې شمېر يې ۱۰۰۰ ټوکه وو، د هلمند بارک او فولاد صنعتي شرکت د مسؤل الحاج نقیب الله حقمل له لوري ژمنه شوي وو، چې د اطلاعاتو او کلتور رياست د کلتور او ګرځندوی آمر مولوي سلطان محمد حنیف ته د ياد شرکت د هلمند څانګې مسؤل له لوري وسپارل شول.
مولوي سلطان محمد حنیف وويل: دې کتابونو سره به عامه کتابتون لا غني شي او د لوستوونکو لپاره به نوي چاپ شوي کتابونه په واک کي ورکړل شي، تر څو ورڅخه په مطالعې کې استفاده وکړي.
ښاغلي حنیف له نورو سوداګرو او هغو کسانو چې په کورونو کي یې تر استفادې زیات کتابونه پراته وي غوښتنه وکړه، چې کتابونه عامه کتابتونونو ته وسپاري، تر څو لوستونکي ورڅخه ګټه واخلي او په ټولنه کي د کتاب مینه وال زیات شي.
۱۴۴۶/۷/۲۶ ق
۱۴۰۳/۱۱/۸ ل
