د هرات د اطلاعاتو او کلتور رئيس د عروج څيړنيزې او خپرندويه ادارې څخه لیدنه وکړه

د هرات د اطلاعاتو او کلتور رئيس مولوي احمدالله متقي د عروج څيړنيزې او خپرندويه ادارې له مهمو برخو تألیف او ژباړې، خپرنيزې، رسنیزې څانګې او د عروج د عصري علومو  اکاډمۍ څخه ليدنه وکړه او د دې علمي او کلتوري مرکز د هر اړخیز ملاتړ ټینګار یې وکړ.
ښاغلي متقي د عروج ادارې د ګټورو فعالیتونو ستاینه وکړه او دا اداره یې د کلتوري ارزښتونو د پیاوړتیا لپاره اغېزمنه او د ټولني له اساسي اړتياوو څخه يوه وبلله.
بل لور ته د عروج څيړنيزې او خپرندويه ادارې مسوولینو د هرات د اطلاعاتو او کلتور ریاست له همکارۍ مننه وکړه او ټینګار یې وکړ، چې خپلو علمي او کلتوري فعالیتونو ته به دوام ورکړي.
د یادونې وړ ده، چې د عروج څيړنيزه او خپرندويه اداره له څو کلونو راهیسې په علمي او کلتوري برخو کې هڅې کوي او د سمینارونو، ورکشاپونو، د کتاب ‌لوستلو سیالیو او بېلابېلو کلتوري پروګرامونو له لارې د استادانو، محصلینو، د ښوونځیو زده‌کوونکو او د اکاډمیکو بنسټونو ملاتړ کوي.

۱۴۴۶/۸/۲۴ ق
۱۴۰۳/۱۲/۵ ل