د هرات د اطلاعاتو او فرهنګ رئیس د ترکیې له جنرال قونسل سره وکتل
د هرات د اطلاعاتو او فرهنګ رئیس مولوي عتیقالله عزیزی په دغه ولایت کې د ترکیې له جنرال قونسل تزجان قاضي اوغلو سره په کتنه کې د فرهنګي همکاریو د پراختیا او د هرات تاریخي او فرهنګي مخینې ته د پاملرنې اړوندو موضوعاتو په اړه خبرې وکړې.
په دې کتنه کې ښاغلي عزیزی په فرهنګي برخه کې د ترکیې هېواد له لېوالتیا او همکاریو څخه مننه وکړه او ویې ویل: د هرات خلک په فرهنګي، لیکوالۍ او ادبي برخو کې ځانګړې لېوالتیا لري. نوموړي زیاته کړه، چې هرات له پخوا راهیسې د شاعرانو، لیکوالانو او وتلو فرهنګي شخصیتونو ښار پاتې شوی او راتلونکو نسلونو ته د دغه ښار د تاریخي او فرهنګي میراثونو ورپېژندل د فرهنګي بنسټونو له مهمو مسؤولیتونو څخه دي.
ښاغلي عزیزي په افغانستان کې د سترو بیارغونې او پراختیايي پروژو یادونه وکړه او له دوستو هېوادونو، په ځانګړي توګه له ترکیې هېواد څخه یې په فرهنګي او پراختیايي برخو کې د لا زیاتو همکاریو او ملاتړ د دوام غوښتنه وکړه.
ورته مهال هرات کې د ترکیې جنرال قونسل هم د دغه ولایت تاریخي او فرهنګي ارزښت ته په اشارې سره وویل: هرات تل ځانګړی اهمیت درلودلی دی، همدارنګه ترکیه په هرات کې د خپل قونسلګرۍ، افغان-ترک ښوونځیو او د تیکا دفتر له لارې په ښوونیزو او فرهنګي برخو کې فعالیتونه کوي او دغه همکارۍ به دوام ولري.
نوموړي زیاته کړه، چې د سلطان حسین بایقرا په اړه یوه نړیوال کنفرانس به جوړ شي، همدارنګه یې د فرهنګي همکاریو پر دوام او په افغانستان، په ځانګړي ډول هرات کې، د بیارغونې او پراختیايي پروژو د ملاتړ پر دوام ټینګار وکړ.
۱۴۴۸/۳/۴ هـ ق
