د ناشرينو، کتابپلورونکو، چاپخونو او کاغذ واردوونکو د ستونزو د هوارۍ غونډه ترسره شوه

د اطلاعاتو او کلتور وزارت د خپرونو معینیت د بیهقي کتاب خپرولو ریاست لخوا د ناشرينو، کتابپلورونکو، چاپخونو او کاغذ تولیدوونکو او واردوونکو د ستونزو د هوارۍ او همږغۍ غونډه د مولوي عبدالعلیم ځانواک مفتي زاده په مشرۍ ترسره شوه.
په دې غونډه کې د ناشرينو او شخصي کتابپلورونکو لپاره د بدیل ځای د وېش بهیر، او د کتابپلورونکو او خپروونکو د فعالیت د جواز اخیستو په اړه هر اړخیزې خبرې وشوې.
مولوي عبدالعلیم ځانواک مفتي ‌زاده د ناشرينو او کتابپلورونکو د فعالیت د جواز ارزښت او اهمیت ته اشاره وکړه او له هغوی څخه یې وغوښتل، چې د دې ریاست له لارې خپل جوازونه ترلاسه کړي. نوموړي زیاته کړه؛ چې بدیل ځایونه به د فعالیت جوازونو پر اساس وېشل کېږي.
د يادونې وړ ده، چې د خپروونکو او شخصي کتاب پلورونکو د فعالیت جواز ځانګړی اهمیت لري، ځکه چې په دې سره هغوی کولای شي، په قانوني ډول د کتابونو په صادراتو او وارداتو، فرهنګي قراردادونو، او داخلي او نړیوالو کتاب نندارتونونو کې ګډون وکړي.

۱۴۴۶/۷/۱۵ ق
۱۴۰۳/۱۰/۲۷ ل