د لغمان پوهنتون د ژورنالېزم څانګې زده کړیالانو ته به میاشتنۍ ښوونیزه برنامه پیل شي
د افغانستان د ژورنالیستانو ملي اتحادیې د لغمان ولایتي دفتر، د اطلاعاتو او کلتور ریاست په همکارۍ د لغمان پوهنتون د ژورنالیزم څانګې زده کړیالانو د عملي روزنې په موخه میاشتنۍ ښوونیزه برنامه ترسره کوي.
په دې اړه نن د لغمان پوهنتون په ریاست کې غونډه وشوه، په یاده غونډه کې د اطلاعاتو او کلتور رئیس مولوي عبدالنور رسولي، د لغمان پوهنتون رئیس پوهنمل محب الله هدایت، د اطلاعاتو آمر او د ژورنالیستانو ملي اتحادیې ولایتي مسؤل عتیق الله قریشي ګډون کړی و.
په پیل کې د اطلاعاتو آمر او د اتحادیې ولایتي مسؤل عتیق الله قریشي وویل، د افغانستان د ژونالیستانو ملي اتحادیه په پام کې لري، چې د هېواد په ۷ ولایتونو کې د ژورنالیزم د وروستي کال یا وروستیو فارغ شویو ۱۰۰ تنو په شاوخوا کې زده کړیالانو لپاره د عملي زده کړو زمینه برابره کړي چې لغمان هم پکې شامل دی.
نوموړي زیاته کړه دوی په لومړي قدم کې د اطلاعاتو او کلتور ریاست سره په همغږۍ د لغمان پوهنتون ۱۵ تنو زده کړیالانو ته میاشتنۍ عملي زده کړې ورکوي، ترڅو محصلین د نظري زده کړو ترڅنګ بشپړې عملي زده کړې هم تر لاسه کړي.
د لغمان پوهنتون رئیس ښاغلي قاري محب الله هدایت د زده کړیالانو عملي روزنه د ژورنالیستانو د ملي اتحادیې یو غوره ګام وباله، هغه وویل، په دې سره به زده کړیالان وکولای شي د نظري زده کړو ترڅنګ عملي زده کړې هم ترلاسه کړي.
۱۴۴۴/۱۲/۲۱ هـ ق
۱۴۰۲/۴/۱۸ هـ ش
