د لغمان اطلاعاتو او کلتور ریاست له رسنیو او خبریالانو سره د همغږۍ ناسته وکړه

په لغمان ولایت کې د اطلاعاتو او کلتور ریاست ددې ولایت د رسنیو له استازو او خبریالانو سره د همغږۍ ناسته وکړه. دغه ناسته د اطلاعاتو او کلتور رئیس مولوي عبدالنور رسولي تر مشرۍ لاندې ترسره شوه.
د غونډې په پیل کې ښاغلي رسولي وویل، رسنۍ باید لا ډېره هڅه وکړي، ترڅو ټولنې ته ښه پیغامونه ورسوي، هغه له رسنیو وغوښتل چې خپلې خپرونې د اسلامي او افغاني ارزښتونو په پام کې نيولو سره تر سره کړي او داسې څه نشر نه کړي چې له شریعت، ټولنې او کلتور سره په ټکر کې وي.
د رسنیو استازو د اطلاعاتو او کلتور ریاست څخه مننه وکړه، چې وخت پر وخت له دوی سره ناستې کوي، د خپرونو د اصلاح لپاره یې متوجه کوي، هغوی وویل، د یاد ریاست ټولې غوښتنې او سپارښتنې به مني او د تطبیق لپاره به یې کار کوي.

۱۴۴۴/۱۲/۲۲ هـ ق
۱۴۰۲/۴/۱۹ هـ ش