د غور ولایت رسنیو مسؤلینو، خبریالانو او امارتي ادارو مطبوعاتي مسؤلینو ته د ظرفیت لوړونې په موخه سمینار جوړ شو

دغه روزنیز سمینار د غور ولایت د اطلاعاتو او کلتور ریاست او د یوناما د لویدیځ زون دفتر په همکارۍ ۲۸ تنو د رسنیو مسؤلینو، خبریالانو او امارتي ادارو مطبوعاتي مسؤلینو ته د ظرفیت لوړونې په موخه جوړ شوی و.
یاد روزنیز سمینار کې د اطلاعاتو او کلتور رئیس مولوي عبدالحی زعیم ترڅنګ د افغان خبریالانو د خوندیتوب کمیټې مسؤل غلام رباني هدف‌مند د دې ولایت د اطلاعاتو او ملي راډیو تلویزیون آمرینو ګډون کړی وو.
د اطلاعاتو او کلتور رئیس د یوناما له هڅو څخه د مننې ترڅنګ وویل: لکه څنګه چې رسنۍ د ملت او دولت ترمنځ د اړیکو پل دی، نو اړتیا ده، چې د رسنیزو کارکوونکو د ظرفیت لوړونې لپاره لا زیات تمرکز وشي.
په ورته وخت کې د یوناما د لویدیځ زون د عامه اړیکو مسؤل عبدالحمید واحدي د دقیقو معلوماتو د رسولو او د رسنیو د ملاتړ په برخه کې د اطلاعاتو او کلتور ریاست هڅې وستایلې او ډاډ یې ورکړ، چې یوناما دفتر به د اسلامي امارت ترڅنګ، د رسنیو د ملاتړ په برخه کې د اسلامي امارت د پالیسیو او د رسنیو د قانون پام کې نېولو سره کار ته دوام ورکړي.
د یادولو وړ ده، چې تېر کال هم دې ولایت کې د رسنیو مسؤلینو، خبریالانو او امارتي ادارو مطبوعاتي مسؤلینو ته ورته روزنیز سمینارونه جوړ شوي وو.
1446/12/6 هـ ق