د غور د اطلاعاتو او کلتور رئیس د شهرک ولسوالۍ د تاریخي او لرغونو سیمو څخه لیدنه وکړه
د غور ولایت د اطلاعاتو او کلتور رئیس مولوي عبدالحی زعیم د شهرک ولسوالۍ ته په سفر کې د جام تاریخي او لرغوني منار وضعیت، د هغې تاریخي سیمې ځانګړي ځایونه او په ځانګړې توګه د اوبو زېرمه چې ۶ متره اوږده، ۳ متره پراخه او ۴ متره لوړوالی لري او د منار جام څخه یو کیلومتره لرې موقعیت لري، چې لرغون والی یې منار جام سره برابر دی، ارزونه ترسره کړه.
د اطلاعاتو او کلتور رئیس تاریخي او لرغونې ودانۍ ملي پانګې، تاریخي ارزښتونو، د هېواد هویت او لرغون والی ګڼلې او د هغوی د لا ښه ساتنې ټینګار یې وکړ.
هغه ټولو مسؤلینو ته چې د منار جام سیمې سره تړاو لري، لارښوونه وکړه چې د عالي قدر امیرالمؤمنین حفظه الله د فرمان په اساس د تاریخي ودانیو ساتنه وکړي او هېچا ته هم د دغو ودانیو غصب، کیندنې او قاچاق اجازه ور نه کړي.
یادونې وړ ده چې ښاغلي زعیم په دې سفر کې د جام رود وضعیت څېړلو سربېره د منار ترڅنګ هوټل لیدنه وکړه او د غور - هرات لویې لارې د پروژې له انجنیرانو سره یې هم مشورې وکړې ترڅو د لرغونو او تاریخي سیمو سره نږدې د کار په وخت کې دغو سیمو ته زیان ونه رسېږي.
۱۴۴۶/۸/۱۰ هـ ق
۱۴۰۳/۱۱/۲۱ هـ ل
