د غزني د اطلاعاتو او کلتور ریاست له ښوونیز مرکز څخه ۱۵۰ تنه فارغ شول. 

د غزني اطلاعاتو او کلتور ریاست ښوونیز مرکز لسمې دورې څخه د کمپیوټر د بېلابېلو پروګرامونو څخه ۱۵۰ تنه د څلور میاشتنیو زده کړو وروسته فارغ شول.
په دې تړاو غونډه، چې د اطلاعاتو او کلتور ریاست په انګړ کې جوړه شوې وه، د اطلاعاتو او کلتور ریاست د اطلاعاتو آمر مولوي عبدالله منصور فارغو زده کونکو ته د مبارکۍ ترڅنګ، د پوهې د ارزښت او موجوده فرصتونو، چې د اسلامي نظام له راتګ سره رامنځته شوي دي، هر اړخیزې خبرې وکړې، نوموړي له ځوانانو وغوښتل چې خپل وخت بې ځایه تېر نه کړي، بلکې د مهارتونو د ترلاسه کولو لپاره هڅې وکړي. 
ښاغلي منصور په خپلو خبرو کې د عصري علومو د حاصلولو تر څنګ د دیني علومو، سیرت النبي (ص) او قرآن کریم د زده کړو په حاصلولو ټینګار وکړ.
د ځوانانو چارو آمر سید جلال زاهد په ځوانانو غږ وکړ، چې د اطلاعاتو او کلتور ریاست ښوونیز مرکز کې د زده کړو له وړیا فرصت څخه ګټه واخلي.
نوموړي د غزني ولایت د نورو ښوونیزو مرکزونو سره د اطلاعاتو او کلتور ریاست له لوري د شوي تړون په اساس د تخفیف خبره وکړه او ویې ویل: د لیوالتیا په صورت کې به دوی یادو ښوونیزو مرکزونو ته په ښه تخفیف وروپېژني.

۱۴۴۶/۶/۱۳ هـ ق
۱۴۰۳/۹/۲۵ هـ ل