د عامه کتابتونونو رياست او يو شمېر همکارو بنسټونو ترمنځ د همږغۍ ناسته وشوه
د اطلاعاتو او کلتور وزارت اړوند د عامه کتابتونونو رئيس حافظ نعمت الله منتظر په خپل کاري دفتر کې د يو شمېر همکارو بنسټونو له استازو سره د همږغۍ ناسته وکړه.
په دې ناسته کې د ارتباطاتو (TLO) مؤسسې، شانتي (SVA) مؤسسې، د کابل پوهنتون د کتابتون آمر، او د (ESA) مؤسسې استازو ګډون کړی وو.
د غونډې موخه "د کابل کتاب فستيوال ۲۰۲۵" تر عنوان لاندې د يوه نړيوال کنفرانس پر جوړولو هر اړخيز بحث او د نظرونو تبادله وه، چې تر څنګ يې په روان کال کې د نورو ګډو غونډو او برنامو د همږغۍ پر څرنګوالي هم خبرې وشوې.
