د عالیقدر امیرالمؤمنین حفظه الله د فرمانونو تر عنوان لاندې ازرې ولسوالۍ کې مشاعره وشوه

د لوګر ولايت د اطلاعاتو او کلتور ریاست له لوري د الکوثر فکري او فرهنګي ادارې په همکاري د ازرې ولسوالۍ اړوند منګلو درې سیمه کې د مشاعرو په اړه د عالیقدر امیرالمؤمنین حفظه الله د وروستي فرمان ترعنوان لاندې مشاعره جوړه شوه، چې پکې د اطلاعاتو او کلتور رئیس دوکتور رفیع الله صمیم، د ګڼ شمېر امارتي ادارو مسؤلينو، ځوانانو، قومي مشرانو او شاعرانو ګډون کړی وو.
دوکتور رفیع الله صمیم د مشاعرو په اړه د عالیقدر امیرالمؤمنین حفظه الله د وروستي فرمان په اړه معلومات وړاندې کړل او ویې ویل: ډېر د ویاړ ځای دی، چې د ازرې ولسوالۍ یوه ښکلي طبیعي سیمه کې له ځوانانو سره یو ځای د مشاعرې ګډونوال یو.
ښاغلي صمیم د ادب، شعر، شاعرۍ او نورو علمي برخو کې ځوانانو ته یو لړ سپارښتنې وکړې او هم یې د مشاعرو په اړه د عالیقدر امیرالمؤمنین حفظه الله ورستی فرمان د ټولنې د دغه مهم قشر لپاره خورا اړین او ګټور وباله.
همدا راز د مشاعرې په ترڅ کې ګڼو شاعرانو او ترانه ویونکو خپل ترتیب کړي شعرونه، نظمونه او ترانې له ګډونوالو سره شریک کړل.
د یادونې وړ ده، چې تېر کال هم د اطلاعاتو او کلتور ریاست له لوري د ازرې ولسوالۍ اکبرخېلو چینه کې د فرهنګي خوځښت تر عنوان لاندې مشاعره جوړه شوې وه.

۱۴۴۷/۱/۱۳ هـ ق