د سیمهییزو رسنیو او د امارتي ادارو له مطبوعاتي مسؤلینو سره د همغږۍ غونډه وشوه
د غور ولایت د اطلاعاتو او فرهنګ ریاست له لوري د دې ولایت د سیمهییزو رسنیو له استازو، خبریالانو او د امارتي ادارو له مطبوعاتي مسؤلینو سره د لا زیاتې همغږۍ او پر وخت او کره معلوماتو د خپرولو په موخه د همغږۍ غونډه ترسره شوه.
په دې غونډه کې د اطلاعاتو او فرهنګ رییس د رسنیو ستونزې وڅېړلې او رسنیو ته د ارتباطي چینلونو له لارې د معلوماتو د رسولو پر څرنګوالي او د اطلاعرسونې پر وضعیت خبرې وکړې. نوموړي ډاډ ورکړ، چې په دې برخه کې هڅې روانې دي، ترڅو د معلوماتو د شریکولو په بهیر کې هېڅ ډول خنډ رامنځته نه شي.
د سیمهییزو رسنیو استازو، خبریالانو او د امارتي ادارو مطبوعاتي مسؤلینو د اطلاعاتو او فرهنګ ریاست له همکارۍ او همغږۍ څخه مننه وکړه او د ورته غونډو جوړول یې د اطلاع رسونې په برخه کې مهمې وبللې.
۱۴۴۸/۳/۱۳ هـ ق
