د سرپل د بلخاب ولسوالۍ له تاريخي آبداتو ليدنه وشوه

د سرپل ولايت د اطلاعاتو او کلتور رياست رئيس ملا عبدالغفار حقنما، د ملي راډيو تلويزيون آمر عبدالخالق حماد او د فرهنګ او ګرځندوی آمر عبدالمالک بلوچ بلخاب ولسوالۍ ته د سفر پرمهال د مير سيد علي او مير سید حسین له مقبرو او د پیر غوله له جهيل څخه ليدنه وکړه.
د اطلاعاتو او کتلور رئيس وویل: د مير سید علي مقبره د سرپل ولايت يو له لرغونو تاريخي آبدو څخه ده، چې شاوخوا ۶۰۰ کاله تاريخي لرغونتوب لري، همداراز د پير غوله جهيل هم ددې ولسوالۍ يو له سياحتي او تفريحي ځايونو څخه دی، چې د هيواد په کچه يو له بې مثاله ځايونو څخه ګڼل کيږي.
نوموړي له خلکو سره د ليدنې پر مهال د تاريخي آبدو او لرغونو ځايونو په اړه وويل: د لرغونو ځايونو او تاريخي آبدو ساتنه د يو ملت د هويت ساتنه ده، باید په دې برخه کې د اطلاعاتو او کلتور رياست سره همکاري وکړئ.
د يادونې وړ ده، چې د اطلاعاتو او کلتور رئيس ملا عبدالغفار حقنما د خپلو سفرونو په ترڅ کې د سرپل ولايت سانچارک ولسوالۍ ته هم د رسمي سفر پر مهال د يادې ولسوالۍ له ولسوال حاجي عنایت الله خیرانديش، امنيه قوماندان او د ولسوالۍ له نورو مسؤلينو سره هم ليدنې وکړې.
نوموړي د ليدنو په ترڅ کې ځوانان د ټولنې مهم قشر وباله او ويې ويل: د اطلاعاتو او کلتور رياست يو له مهمو موخو څخه د يووالي رامنځته کول او ځوانانو ته د تعليمي او کاري فرصتونو برابرول دي.

۱۴۴۶/۳/۱۸ هـ ق
۱۴۰۳/۶/۳۱ هـ ل