د خوست اطلاعاتو او کلتور رياست کې د ( ترنم ستوري) تر سرليک لاندې سیالي تر سره شوه

د خوست ولايت د اطلاعاتو او کلتور رياست په انګړ کې د تخنیکي او مسلکي زده کړو ادارې د ترنم او فرهنګ رياست له لوري د ښوونځیو زده کوونکو او دیني مدارسو طالبانو تر مینځ د مرحوم جلال الدین حقاني په یاد کې (د ترنم ستوري) تر سرلیک لاندې علمي او کلتوري سيالي جوړه شوه.
د مسؤلینو په وینا د یادې سیالۍ له جوړولو څخه یې اساسي موخه د ښوونځيو زده کوونکو او ديني مدارسو طالبانو تر مینځ واټن له مینځه وړل دي. په دې اړه د تخنيکي او مسلکي زده کړو ادارې استازي عزت الله وویل: ورته پروګرامونه يي په راتلونکې کې په نورو ولایاتونو کې هم په پام کې دي، ترڅو وکولای شي چې ځوان ترنم کوونکي ستوري ومومي او پټ استعدادونه رابرسېره کړې.
ِ همدا راز د خوست مرستیال والي مولوي محبوب شاه قانت په خپلو خبرو کې د ښوونځیو زده کوونکي او مدارسو طالبان یووالي ته را وبلل او په وینا یې چې ښوونځی او مدرسه یوه ده.
د سيالۍ ګډونوالو یاده سیالي ګټوره وبلله او له مسؤلینو څخه يې غوښتنه وکړه چې په راتلونکې کې هم دا ډول پروګرامونه جوړ کړي.

۱۴۴۵/۴/۳۰ هـ ق
۱۴۰۲/۸/۲۳ هـ ش